Ola, son César Salgado García. Esta web, que comecei o 12 - II - 1999, está escrita en galego. Sigue o enlace para saber máis do galego e de Galicia. Se ves enlaces rachados, erros de ortografía ou traducción... escríbeme. Graciñas.
As novidades pódense consultar no blog de César Salgado.
Quen son
Ollo, isto non é un curriculum senón un ridiculum.
- 1972: vexo a luz na Coruña. En realidade vexo varias luces e bastante borrosas, debido ó estrabismo, á miopía e ó astigmatismo que cultivarei durante o resto dos meus días.
- 1973: despois de repetidos tropezos coa mesma esquina do piso, meus pais e un oculista deciden que teño que poñer lentes.
- 1977: aprendo (sen os mestres) a escribir palabras. Fago a carta ós Reis Magos con todo o que se move no televexo, pero non lle poño acuse de recibo. Silencio máxico-administrativo; ilusión ferida e cauterizada.
- 1978: fase erótica 1.0 (dígolle a unha compañeira que quero casar con ela, nunca tiven resposta).
- 1979: aprendo dos mestres (e apenas entendo para que vale) a teoría de conxuntos. Vinte e cinco anos máis tarde descubrirei que eu xa o entendo, pero os mestres nunca o fixeron.
- 1980: aprendo dos mestres e olvido rapidamente "Señor mío, Jesucristo" e outras oracións inintelixibles. Invento un algoritmo alternativo para a división con divisor de varias cifras. Póñoo en práctica cando un inspector visita a escola e nin el nin o mestre o entenden... líbrome por pouco dos golpes de regra que os meus condiscípulos experimentan cada día. Un "test" de intelixencia aventura que son subnormal. Aplicando o falsacionismo de Karl Popper pode levar un chisco a refutación de tal hipótese.
- 1982: aprendo dos mestres (con lágrimas) e olvido rapidamente listas de accidentes xeográficos e escanos provinciais no Congreso e no Senado, e leccións recitadas de memoria.
- 1984: fase erótica 2.0 (sen intervención de George Orwell, escribo algunha carta e algún poema, de amor, claro).
- 1986: fase mística 1.0 (máis preocupado polos meus procesos pilosos que polos meus procesos mentais, perdo algo o norte e regálanme un compás).
- 1987: fase erótica 3.0 (a partir de aquí a película ten dous rombos).
- 1988: fase deportista 0.1 beta (quedo cuarto nunha carreira onde participamos catro e oitavo noutra onde participamos oito).
- 1989: empezo a cantar en coros polifónicos, onde aprendo case todo o que sei da música e coñezo xente marabillosa.
- 1990: fase mística 2.0 (perdo o norte, o curso, os amigos... meus pais perden os cartos, a paciencia...). Sen relación aparente co anterior, comezo a traballar como celador substituto. Co primeiro soldo compro o meu primeiro reproductor de discos compactos.
- 1993: entro na Escola de Maxisterio de Compostela. Aquí fago amigos excelentes, gracias, en parte, ás miñas actividades "políticas" como representante do alumnado.
- 1996: fase mística 3.0 (insubmisión ao exército, con trasacordo un ano despois). Estadía académica no Instituto Kodály en Kecskemét, Hungría.
- 1999: consigo, por fin, un título oficial que leva escrito "mestre especialista en educación musical" (as malas linguas propalaron que foi a base de xamóns). Tamén deste ano son as miñas primeiras composicións. Comezo en Geocities (daquela independente de Yahoo!) esta miña páxina persoal (estará alí seis anos).
- 2001: comezo a traballar como mestre substituto. Fareino en tantas escolas que so menciono aquelas onde máis aprendín dos nenos, ou dos compañeiros, como Lourenzá, O Porriño, Ribeira de Piquín e A Castellana.
- 2002: caso con Marta, formalizando así (burocraticamente, que eu sempre fun moi formaliño) a relación que comezáramos cinco anos antes.
- 2005: traslado as miñas páxinas ó dominio "cesarsalgado.net", canso de aturar varios aloxamentos con límites de espazo e publicidade non sempre decorosa.
- 2006: nace o noso fillo Pedro. Comezo o blog de César Salgado.
Algunhas cuestións que me interesan
Durante anos colaborei con moitas ONGs, incluíndo as seguintes:
